Bakıdakı metro stansiyalarında generatorların quraşdırılması 100?şa çatıb. Artıq elektrik enerjisi fasiləsi yarandıqda sərnişinlər metroda qalmamalıdır.

Chip.az "Marja"-ya istinadən xəbər verir ki, Azərbaycan Prezidenti İlham Əliyev “Azərenerji” ASC-nin prezidenti Baba Rzayevi qəbul edərkən generatorların quraşdırılması ilə maraqlanıb.

İlham Əliyev: Keçən ilin yayında baş vermiş qəza əlbəttə ki, bizə çox baha başa gəldi. Bundan həm bizim vətəndaşlar əziyyət çəkdilər, metroda qalanlar oldu, həm də sənaye müəssisələri ziyan çəkdi. Qəzadan sonra mən göstəriş vermişdim ki,  bizim bütün metro stansiyalarında generatorlar quraşdırılsın. Generatorların əsas işi ondan ibarətdir ki, əgər qəza baş verərsə, qatarlar perrona qədər hərəkət edə bilsinlər və eskalatorlar da işləsinlər. Generatorların quraşdırılması nə yerdədir? Bu iş başa çatıb, yoxsa yox?

Baba Rzayev: Cənab Prezident, məruzə edim ki, bu iş artıq 100 faiz başa çatıb. Artıq mərkəzi idarəetmə pultu Bakı Metropoliteninin baş ofisindədir və orada təhvil-təslim işləri başa çatıb. Bizim 10 yarımstansiyada gücü 2500, 2000 və 1000 kilovolt olan 17 generator quraşdırılıb və 39 meqavat yeni güc mənbəyi yaradılıb və ehtiyata verilib. İşlər çox yüksək səviyyədə tam başa çatıb.