Boeing Ayın səthinə enəcək aparatın layihəsini NASA-ya təqdim edib

  • 06 Noyabr 2019

“Boeing” şirkəti Ayın səthinə enəcək aparatın layihəsini ABŞ-ın Aeronavtika və Kosmik Tədqiqatlar Milli Agentliyinə (NASA) təqdim edib.

Chip.az AZƏRTAC -a istinadla xəbər verir ki, layihə ilə bağlı məlumat şirkətin saytına yerləşdirilib.

“Human Lander System” (HLS) adlanan modul iki hissədən ibarətdir. Onlardan biri astronavtları Yerin təbii peykinin səthinə endirəcək, digəri isə orbitə qalxmaq funksiyasını yerinə yetirəcək. “Boeing” şirkəti mühəndisləri hesab edirlər ki, hər iki elementi “Space Launch System” ağır raketdaşıyıcısı ilə kosmosa göndərmək mümkün olacaq. Bu plan əlavə raket buraxılışı ilə bağlı yaranan problemləri aradan qaldıracaq və Ayın orbitində birdən-birə bir neçə kosmik aparatın yerləşməsinin qarşısını alacaq. Şirkətin məlumatına görə, yeni planda astronavtların Ayın səthinə enməsi prosesi əvvəllər nəzərdə tutulduğu 11 mərhələdən cəmi 5-ə düşürüləcək.

Korporasiyadan bildiriblər ki, yeni aparatı NASA-nın sifarişi ilə hazırlanan “Gateway” Ayətrafı stansiyası və ya “Lockheed Martin” şirkətinin istehsal edəcəyi “Orion” kosmik gəmisi ilə birləşdirmək mümkündür. “Boeing”in məlumatında o da qeyd olunur ki, aparatın layihəsində yer almış əsas texnologiyaların əksəriyyəti “Boeing CST-100 Starliner” kommersiya gəmisinin detalları üzrə hazırlanıb.

Xatırladaq ki, bu ilin yazında NASA Ayın tədqiqi üzrə yeni proqramın “Artemida” adlanacağını bəyan edib. Qeyd olunub ki, missiya üç mərhələdən ibarət olacaq: Birinci mərhələdə - 2020-ci ildə “Orion” pilotsuz kosmik gəmisinin Ayın orbitində sınaq uçuşları və onun yerə qayıtması, ikincidə - 2022-ci ildə pilotlu missiyanın Yerin təbii peykinin ətrafında uçuşu nəzərdə tutulur. 2024-cü ildə isə Amerika astronavtlarının Ayın səthinə enməsi həyata keçiriləcək.

© Materiallardan istifadə edərkən hiperlinklə istinad olunmalıdır