OpenAI ofisində gizli dinləmə cihazı aşkarlanıb

OpenAI-nin San-Fransiskodakı ofisində gizli dinləmə cihazı aşkarlanıb. Şirkətin süni intellekt modelləri cihazın mənşəyinin araşdırılmasına və şübhəli şəxsin müəyyənləşdirilməsinə kömək edib. Mühəndisə qarşı rəsmi ittiham irəli sürülüb.

ABŞ-ın OpenAI şirkətinin San-Fransiskodakı ofisində gizli dinləmə cihazı aşkar edilib. Şirkət daxili süni intellekt modellərinin köməyi ilə cihazı quraşdırmaqda şübhəli bilinən mühəndisi müəyyənləşdirib və məsələni Federal Təhqiqatlar Bürosuna (FTB) yönləndirib.

Hadisə sentyabrın 30-da şirkətin rəhbərlik otaqlarından birində baş verib. Dinləmə cihazı televizorun arxa panelindəki USB girişinə qoşulmuş və kağız parçası ilə gizlədilmiş vəziyyətdə tapılıb.

Şübhəli şəxs kimdir?

ABŞ Ədliyyə Nazirliyinin məlumatına görə, şirkətdə 2025-ci ilin iyulundan çalışan 35 yaşlı Səudiyyə Ərəbistanı vətəndaşı, mühəndis Əbdülrəhman Əlfozana qarşı 13 oktyabr 2026-cı ildə rəsmi ittiham irəli sürülüb. Müşahidə kameralarının görüntülərində onun icazəsi olmadığı halda dəfələrlə həmin otağa daxil olduğu qeydə alınıb.

Süni intellekt necə kömək edib?

OpenAI bildirib ki, daxili süni intellekt modelləri cihazın texniki xüsusiyyətlərinin təhlilinə, mənşəyinin müəyyənləşdirilməsinə və şübhəlinin aşkar edilməsinə kömək edib. Şirkət istifadə olunan modellərin adlarını açıqlamayıb, lakin texnologiyanın daxili təhlükəsizlik araşdırmalarında rolunu vurğulayıb.

Məlumata görə, mühəndis ittiham üzrə təqsirli bilinərsə, beş ilədək həbs və 250 min ABŞ dollarınadək cərimə ilə üzləşə bilər.