Brundle Edition Turbo: cəmi 5 ədəd istehsal olunacaq

Martin Brundle ilə birgə hazırlanan 860 at güclü Brundle Edition Turbo mexaniki sürətlər qutusu ilə təchiz olunub.

Avtomobil istehsalçısı Gunther Werks keçmiş Formula 1 pilotu Martin Brundle ilə birgə hazırladığı Brundle Edition Turbo modelini təqdim edib. Avtomobildən cəmi 5 ədəd istehsal olunacaq, qiyməti isə hələ açıqlanmayıb.

Model 4,0 litrlik, iki turbokompressorlu, altı silindrli mühərriklə təchiz edilib. Mühərrik 860 at gücü və 827 Nm fırlanma anı hasil edir, 6 pilləli mexaniki sürətlər qutusu ilə birləşdirilib. Karbon lifindən geniş istifadə sayəsində avtomobilin çəkisi təxminən 1 225 kq-dır.

Mavi kuzov rəngi Martin Brundle-ın yarış dəbilqəsindən ilhamlanıb. Salon karbon lifli oturacaqlar və qırmızı qapı üzlükləri ilə seçilir. Hər alıcıya avtomobilin rənglərinə uyğun xüsusi Bell HP77 dəbilqəsi də hədiyyə ediləcək.