Bakılı məktəbli qəhvə biznesini asanlaşdıran platforma yaratdı

Bakının “Landau School” məktəbinin 16 yaşlı şagirdi Fəxri İbrahimov kafe sahiblərinə qəhvə maşınlarını bir fincanın real maya dəyərinə görə müqayisə etməyə kömək edən pulsuz “Roast & Co” platformasını yaradıb.

İstifadəçilər roastcoaze.com platformasında öz büdcələrini və gündəlik gözlənilən qəhvə satışlarının sayını daxil edirlər. Platforma isə Bakıdakı təchizatçıların təklif etdiyi qəhvə maşınlarını bir fincan qəhvənin hazırlanma maya dəyərinə əsasən sıralayır. Fəxri bildirir ki, biznes sahibləri çox vaxt avadanlığın ilkin alış qiymətinə diqqət yetirir, lakin texniki xidmət, baristanın əməkhaqqı və digər istismar xərclərini nəzərə almırlar. Halbuki bu xərclər zaman keçdikcə ilk baxışdan daha ucuz görünən qəhvə maşınını daha bahalı seçimə çevirə bilər. “Bir kataloqda demək olar ki, eyni görünən iki qəhvə maşını bir il ərzində kafenin büdcəsinə tamamilə fərqli məbləğlərə başa gələ bilər. Mən istəyirdim ki, biznes sahibləri pullarını xərcləməzdən əvvəl bunu görə bilsinlər, sonradan deyil”, – deyə o bildirib. Platformanın hazırlanması altı ay çəkib. Fəxri müqayisə modelini yaratmaq üçün espresso maşınlarının qiymətlərini, texniki xidmət və istismar xərclərini toplayıb. Xidmət həmçinin hər fincan qəhvənin karbon izini də hesablayır. Roast & Co qəhvə avadanlıqlarının satışı ilə məşğul olmur. İstifadəçilər uyğun maşını seçdikdən sonra platforma onları həmin avadanlığın təchizatçısına yönləndirir. Fəxri bu yanaşmanı «O To Go» formatı üçün qəhvə maşınlarının təhlilinə də tətbiq edib. Layihə ilə bağlı təqdim olunan məlumata görə, platformada Azərbaycan üzrə 27 qəhvə məkanı yer alır, Instagram səhifəsinin isə təxminən 3 400 izləyicisi var. Roast & Co qeyri-kommersiya təşəbbüsüdür və layihənin yaradıcısı xidmətin istifadəçilər üçün ödənişsiz qalmasını istəyir.